काठमाडाैं । चन्द्रागिरि नगरपालिकाको थानकोट त्रिभुवन पार्कस्थित थ्रिडी आर्ट पछाडि आज बिहान मृत अवस्थामा भेटिएका व्यक्तिको पहिचान खुलेको छ ।
थानकोट प्रहरी वृत्तका अनुसार मृत भेटिएका व्यक्ति चन्द्रागिरि नगरपालिका वडा नंं ३ मा बसोबास गर्ने गणेशमान थिङको रहेको खुलेको हो ।
मृत अवस्थामा भेटिएका थिङको परिवार सम्पर्कमा आएर शव पहिचान गरि सनाखत गरेको प्रहरीले जनाएको हो । प्रहरीका अनुसार मृतक थिङले नियमित मादक पदार्थ सेवन गर्ने गरेको साथै घरमा पनि धेरै बस्ने नगरेको बुझिएको छ ।
थिङलाई मृत अवस्थामा आज बिहान थानकोट, त्रिभुवन पार्कमा रहेको थ्रिडी आर्ट म्युजियमको पछाडिको नालीमा थ्रिडी आर्टकी महिला कर्मचारीले देखेर प्रहरीलाई खबर गरेपछि एम्बुलेन्ससहित प्रहरी घटनास्थलमा पुगेको थियो ।
अहिले थिङको शव पोष्टमार्टमका लागि लगिएको र उक्त घटनाबारे थप अनुसन्धान भइरहेको थानकोट प्रहरीले जनाएको छ ।
