काठमाडाैं । चन्द्रागिरि नगरपालिकाको वडा नं १० बोसी गाउँ सम्बन्धि ३ दशक भन्दा बढी समयको पुराना फोटोहरूको प्रदर्शनी गरिने भएको छ ।
चन्द्रागिरि नगरपालिका वडा नं १० को आयोजनामा क्यालिफोर्निया स्टेट युनिभर्सिटीकी प्राध्यापक, शिक्षाविद् तथा अनुसन्धाता डा. जो एन पाण्डेले सन् १९९२ ताका खिचेको बोसी गाउँ वरपरका पुराना फोटोहरूको प्रदर्शनी तथा अनुभव आदानप्रदान गरिने कार्यक्रममा करिब ३५ वर्ष अघिको बोसी गाउँको सामाजिक जीवन र शैक्षिक अवस्थाका बारेमा समेत अन्तर्कृया गरिन लागेको वडा नं १० का अध्यक्ष शिवकुमार महर्जनले जानकारी दिएका छन् ।
पौष २६ गते शनिबार दिउँसो १२ बजे भैरव मा.वि.मा आयोजना गरिन लागेको फोटो प्रदर्शनी कार्यक्रममा फोटो देखिएका व्यक्तिहरूले बोसी गाउँको विगत र वर्तमानको सामाजिक, शैक्षिक अवस्थामा आएको परिवर्तनबारे तुलनात्मक अनुभव समेत साझा गर्ने जनाइएको छ ।
बोसी गाउँलाई चन्द्रागिरि नगरपालिकाको पुराना मध्येको एउटा छुट्टै सामाजिक, साँस्कृतिक पहिचान र महत्व बोकेको बस्तिका रूपमा लिने गरिन्छ ।
तस्विर :. जो एन पाण्डे/शाेणितपुर खबर
