काठमाडौं । पूर्वमन्त्री तथा बागमती प्रदेश सभा सदस्य रमा आलेमगरको कलेजो प्रत्यारोपण सम्बन्धि प्रक्रिया अगाडि बढेको छ ।
विगत लामो समयदेखि स्वास्थ्य समस्याले पिरोलिएकी पूर्वमन्त्री तथा बागमती प्रदेश सभा सदस्य रमा आलेमगरको कलेजो प्रत्यारोपण सम्बन्धि प्रक्रियाका लागि आज अस्पताल भर्ना हुने र सम्भवत: भोलि सम्पूर्ण स्वास्थ्य परिक्षण पश्चात् डाक्टरहरूको सल्लाह अनुसार उनको कलेजो प्रत्यारोपण गरिने बताइएको छ ।
करिब एकमहिना अगाडि नै उनको कलेजोको निष्क्रिय नसा खोल्ने कार्य भइसकेको साथै केहि समय औषधि सेवन र आराम गर्ने अवधि पश्चात् सम्पूर्ण स्वास्थ्य अवस्थाको चेकजाँच गरि कलेजो प्रत्यारोपण गर्ने तयारी अनुसार नै आलेलाई अस्पताल भर्ना गरिन लागेको उनको पारिवारिक स्रोतले जनाएको छ ।
उसो त दुईदिन अगाडि शोणितपुर खबरले पूर्वमन्त्री रमा आलेसँग उनको पछिल्लो स्वास्थ्य अवस्था र कलेजो प्रत्यारोपण सम्बन्धि विषयमा मेसेजमा कुराकानी गर्दा आफू पूर्णत: स्वस्थ रहेको र पहिलो चरणको उपचार सकिएको साथै अन्तिम र निर्णायक शल्यक्रिया छिट्टै हुने जानकारी दिएकी थिइन् ।
प्रारम्भमा पेटको समस्याले थलिएकी आलेको पछिल्लो समय कलेजोमा समेत गम्भीर समस्या देखिएपछि भारतको मेदान्त अस्पतालमा उनको उपचार चलिरहेको छ ।
