काठमाडौं निर्वाचन क्षेत्र नं १० अन्तर्गत ठुला दलको तर्फबाट उम्मेदवारी दिएका उम्मेदवारहरूको जमानत जफत हुने सम्भावना देखिएको छ ।
प्रतिनिधि सभा सदस्य निर्वाचनको पछिल्लो मत परिणाममा देखिएको मत अन्तरको अवस्थालाई हेर्दा ठुला भनिएका दलहरू नेपाली काङ्ग्रेस, नेकपा एमाले, नेपाली कम्युनिस्ट पार्टी, राप्रपा लगायत पार्टीका उम्मेदवारहरूको जमानत समेत जफत हुने स्थिति देखिएको हो ।
कानुनी प्रावधान अनुसार निर्वाचनमा खसेको कुल सदर मतको १० प्रतिशत मत प्राप्त गर्न नसक्ने उम्मेदवारको जमानत जफत हुने व्यवस्था छ ।
काठमाडौं निर्वाचन क्षेत्र नं १० अन्तर्गत ८३ हजार ३ सय १ मत रहेकोमा ६० हजार १ सय ५१ मत खसेको छ । जस अनुसार जमानत जोगाउन कम्तीमा ठुला दलका उम्मेदवारहरूले ६ हजार मत प्राप्त गर्नुपर्ने देखिन्छ ।
काठमाडौं १० नम्बर क्षेत्रको पछिल्लो मतगणनाको परिणामलाई हेर्दा राष्ट्रिय स्वतन्त्र पार्टीले एकोहोरो मत बटुलिरहेको छ भने अन्य पार्टीको मत अत्यन्त कमजोर देखिएको अवस्था रहेकोेले ठुला भनिएका दलका उम्मेदवारहरूले आफ्नो जमानत समेत जोगाउन मुस्किल पर्ने विश्लेषण गरिएको छ ।
