काठमाडाैं । गुर्भाकोट नगरपालिका–६, बडाखोली स्थायी घर भई वीरेन्द्रनगर–१ मा बस्दै आएकी १६ वर्षीया इनिसा बिकको बलात्कार पछि हत्या गरिएको घटना विरुद्ध जात व्यवस्था उन्मुलन मोर्चा, नेपाल र वैज्ञानिक समाजवादी विद्यार्थी संगठन, नेपालले फागुन २८ गते विरोध प्रदर्शन गर्न लागेको छ ।
फागुन २३ गते बिहान वीरेन्द्रनगर–४, शहीद पार्क नजिकको जनजागरण सामुदायिक वनमा बेहोस अवस्थामा फेला परेकी इनिशालाई प्रहरीले प्रदेश अस्पताल कालागाउँमा पुर्याएकोमा डाक्टरले मृत घोषणा गरेका थिए ।
इनिशाको सामूहिक बलात्कारपछि हत्या भएको भन्दै मृतकका आफन्तहरूले २५ गते जिल्ला प्रहरी कार्यालय सुर्खेतमा उजुरी दिएको थियो भने प्रहरीको प्रारम्भिक अनुसन्धानले पनि इनिसाको बलात्कारपछि मृत्यु भएको देखाएको छ ।
इनिशा बलात्कार-हत्याको घटनामा सुर्खेत प्रहरीले चार जनालाई पक्राउ समेत गरेको छ । पक्राउ परेकाहरू चारै जना १८ वर्षमुनिका नाबालक रहेको बहानामा उन्मुक्ति दिने कसरत भइरहेको भन्दै जात व्यवस्था उन्मुलन मोर्चा, नेपाल र वैज्ञानिक समाजवादी विद्यार्थी संगठन, नेपालले विरोध प्रदर्शन गर्न लागेको जनाएको छ ।
इनिशा बिक वीरेन्द्रनगर–६ मा रहेको उषा बालबाटिका स्कुलमा कक्षा ११ मा पढिरहेकी थिइन् ।
