काठमाडाैं । हुन्डी तथा अभौतिक मुद्रा कारोबारमा संलग्न नागार्जुन नगरपालिकाका सागर गिरी र प्रमोद प्रसाद धिताल १ करोड १६ लाख रुपैयाँ नगदसहित पक्राउ परेका छन् ।
जिल्ला प्रहरी परिसर काठमाडौंबाट खटिएको प्रहरी टोलीले काठमाडौं जिल्लाको नागार्जुन नगरपालिका ८ भिमढुङ्गाबाट हुन्डी तथा अभौतिक मुद्राको कारोबार गरेको अभियोगमा पक्राउ गरेको हो ।
प्रहरीले उनिहरूको साथबाट विभिन्न बैंकको विभिन्न व्यक्तिको नाममा रहेको चेक बुक ३ थान, विभिन्न व्यक्तिको नाममा काटेको २७ लाख ३० हजार रुपैयाँको चेक ३ थान, विभिन्न व्यक्तिको नाममा रहेको विभिन्न बैंकको ATM कार्ड ४ थान, नागरिकता १ थान, चार पाङ्ग्रे सवारी साधन २ ओटा, दुई पाङ्ग्रे सवारी साधन १ ओटा, सवारी दर्ता किताब ३ थान, विभिन्न कम्पनीको मोबाइल फोन ६ थान, एनसेल र एनटिसीको सिमकार्ड ३१ थान, कम्प्युटर १ सेट, तथा ब्यालेन्स खातामा रहेको रकम ७ लाख १७ हजार ५ सय ३४ रुपैयाँ समेत बरामद गरेको छ ।
