काठमाडाैं । नेपाली कम्युनिष्ट पार्टी (नेकपा) का संयोजक पुष्पकमल दाहाल ‘प्रचण्ड’ ले सत्ताको जोडघटाउ भन्दा व्यवस्था रक्षा मुख्य भएको भन्दै प्रदेश सरकार परिवर्तनको खेलमा आफ्नो पार्टी नरहेको स्पष्ट पारेका छन्। आइतबार सुर्खेतमा आयोजित पत्रकार भेटघाटमा बोल्दै संयोजक प्रचण्डले प्रमुख दलहरूबाट आएका सत्ता सहकार्यका प्रस्तावहरूलाई आफूले सिधै इन्कार गरिदिएको खुलासा गरे।
संयोजक प्रचण्डले कांग्रेस र एमाले दुवैतर्फबाट छुट्टाछुट्टै रूपमा प्रदेश सरकार गठनका लागि प्रस्ताव आएको दाबी गरे। “कहीं कांग्रेस, कहीं एमालेबाट प्रस्तावहरू आइरहेका छन्। तर, संयोजकको हैसियतले मैले ती सबै प्रस्ताव इन्कार गरिदिएको छु,” उनले भने, “अहिले एउटालाई बाहिर पठाएर अर्कोसँग सरकारमा जानु गलत हुन्छ। यसले जनतामा भ्रम मात्र छर्छ।”
प्रदेशमा राजनीतिक स्थिरता र नयाँपन दिने हो भने भागबन्डाको सरकार भन्दा पनि संसदमा प्रतिनिधित्व गर्ने सबै दलहरू समेटिएको ‘सर्वदलीय सरकार’ बन्नुपर्ने उनको अडान छ। “होइन भने कांग्रेस–एमाले मिलेरै सरकार चलाउनुस्, हामीलाई सरकार चाहिँदैन भनेर स्पष्ट भनिदिएका छौँ,” प्रचण्डले थपे।
