काठमाडौं । नेपाल चलचित्र कलाकार संघको नयाँ नेतृत्व चयनका लागि सम्पन्न निर्वाचनबाट अध्यक्षमा उत्तम केसी (“चुईचुइ पारेर” उपनामले परिचित) विजयी भएका छन्।
उत्तम केसीले २१६ मत प्राप्त गर्दै आफ्ना प्रतिद्वन्द्वी सविन श्रेष्ठलाई पराजित गरेका हुन्। श्रेष्ठले १३२ मत प्राप्त गरेका थिए।
त्यस्तै, संघको उपाध्यक्ष पदमा पूजना प्रधान र शिवहरी बैरागी विजयी भएका छन्। प्रधानले १४४ र बैरागीले १४६ मत प्राप्त गरेका हुन्। उक्त पदका अन्य उम्मेदवारहरूमा उद्धव भट्टराईले १०७, पनाह अधिकारीले १३५, डिबी तामाङले २७ तथा राजेन्द्र बस्नेतले १८ मत प्राप्त गरेका थिए।
महासचिव पदमा सुनील कटवाल १९५ मतसहित निर्वाचित भएका छन् भने उनका प्रतिस्पर्धी रामेश्वर बुर्लाकोटीले १२५ मत प्राप्त गरेका थिए।
त्यस्तै, सचिव पदमा गोपाल ढकाल २१४ मतसहित विजयी भएका छन्। उनकी प्रतिस्पर्धी पल्पसा डंगोलले ११० मत प्राप्त गरेकी छन् भने कोषाध्यक्ष पदमा तेजुला खतिवडा १४९ मतसहित निर्वाचित भएकी छन्। उक्त पदमा पवित्रा आचार्यले १०६ तथा खुश्वु खड्काले ५८ मत प्राप्त गरेका थिए।
सहकोषाध्यक्ष पदमा पवन केसी १६१ मतसहित विजयी हुँदा गीता नेपालले १५३ मत प्राप्त गरेकी छन्।
नव निर्वाचित कार्यसमितिले कलाकारहरूको हकहित संरक्षण, चलचित्र क्षेत्रको विकास र संघलाई थप सशक्त बनाउने प्रतिबद्धता व्यक्त गरेको जनाएको छ।
