काठमाडौं । चन्द्रागिरि नगरपालिकामा तेश्रो चन्द्रागिरि नगरस्तरीय बोसिया (बोक्सिया) खेल प्रशिक्षण एवं प्रतियोगिता बिहीबारदेखि सुरु भएको छ।
चन्द्रागिरि नगरपालिका प्रशासकीय भवनको चौथो तल्लामा आयोजित औपचारिक कार्यक्रमबीच नगरप्रमुख घनश्याम गिरीले प्रतियोगिताको उद्घाटन गरेका हुन्।
“सबैका लागि खेल” भन्ने नारासहित सञ्चालन गरिएको उक्त दुईदिने कार्यक्रम मस्तिष्क पक्षघात, बौद्धिक अपाङ्गता तथा अन्य अपाङ्गता भएका व्यक्तिहरूलाई लक्षित गरी आयोजना गरिएको हो।
बोसिया प्रतियोगिता तथा प्रशिक्षण कार्यक्रम २०८३ साल जेठ ७ र ८ गते बिहान १० बजेदेखि सञ्चालन भइरहेको छ।
चन्द्रागिरि नगरपालिकाको आर्थिक सहयोग, नेपाल बोसिया (BOCCIA) संघको प्राविधिक सहयोग तथा अपाङ्गता–अभिभावक समाज नेपालको आयोजनामा कार्यक्रम सञ्चालन गरिएको हो।
प्रतियोगितामा मस्तिष्क पक्षघात समूह ‘क’ बाट १५ जना तथा बौद्धिक एवं अन्य अपाङ्गता समूह ‘ख’ बाट १८ जना गरी कुल ३३ जनाको सहभागिता रहेको आयोजकले जनाएको छ।
आयोजकका अनुसार समूह ‘क’ मा रहेका सहभागीबीच प्रतियोगिता सञ्चालन हुनेछ भने समूह ‘ख’ मा रहेका सहभागीहरूलाई प्रशिक्षण प्रदान गरिनेछ।
कार्यक्रमले अपाङ्गता भएका व्यक्तिहरूको खेलकुद क्षमता विकास, आत्मविश्वास अभिवृद्धि तथा सामाजिक समावेशीकरणलाई प्रवर्द्धन गर्ने उद्देश्य राखेको छ।
यसअघि प्रतियोगिताको लोगो सार्वजनिक गरिएको थियो। प्रतियोगिता शुक्रबार सम्पन्न हुने आयोजकले जनाएको छ।
