काठमाडाैं । केन्द्रीय एसियाली भलिबल सङ्घ (CAVA) महिला भलिबल च्याम्पियनसिप आजदेखि काठमाडौंमा सुरु हुँदैछ । घरेलु टोली नेपालले उद्घाटन खेलमै चिरप्रतिद्वन्द्वी भारतसँग प्रतिस्पर्धा गर्दै प्रतियोगिताको सुरुवात गर्ने भएको छ। प्रतियोगिता जेठ ८ देखि १५ (मे २२–२९) सम्म काठमाडौंस्थित त्रिपुरेश्वरको राष्ट्रिय खेलकुद परिषद् (राखेप) कभर्डहलमा सञ्चालन हुनेछ ।
च्याम्पियनसिपमा एफआईभीबीको सेन्ट्रल एसियाभित्र रहेका ८ राष्ट्र नेपालसहित इरान, किर्गिस्तान, भारत, श्रीलंका, बंगलादेश, माल्दिभ्स र काजकिस्तानको सहभागिता रहनेछ ।
नेपाली टोलीमा कप्तान निरुतासहित स्पाइकरमा उषा भण्डारी, सलिना बुढा मगर, कामना विष्ट, रिमा कुँवर, मीना सुना, सेटरमा प्रगति नाथ र जसना महतो, लिबेरोमा सलिना श्रेष्ठ, शान्ति तामाङ, ब्लकरमा सुमित्रा रेग्मी, सुनिता खत्री, वसन्ती साउद र अलिशा मानन्धर छन् । टोलीका मुख्य प्रशिक्षकमा जगदीश भट्ट रहेका छन् ।
प्रतियोगिताको पहिलो दिन शुक्रबार उद्घाटन समारोह अगाडि इरानको सामना बङ्गलादेशले गर्नेछ। उद्घाटन समारोह पछि नेपाल र भारतबीचको खेल दिउँसो ३:३० मा हुने तालिका रहेको छ। यस्तै दिनको तेस्रो खेलमा किर्गिस्तान र माल्दिभ्सबीच प्रतिस्पर्धा हुनेछ।
काभा भलिबल च्याम्पियनसिपको सबै खेल डिगो एपमार्फत हेर्न सकिनेछ । एप स्टोर वा प्ले स्टोरमा Dgo डाउनलोड गरेर हेर्न सकिनेछ ।
