काठमाडाैं । सडक विभागअन्तर्गत सडक डिभिजन कार्यालय, काठमाडौंले चित्लाङ–चन्द्रागिरि–थानकोट सडक (गणेशमान सिंह मार्ग) मर्मत तथा स्तरोन्नति कार्यका लागि १४ दिन सडक बन्द गर्ने सूचना जारी गरेपछि थाहा नगरपालिका–९ ले सरोकारवालासँग छलफल डाकेको छ ।
वडा कार्यालयले विगतमा पनि सडक बन्द गरेर काम गरिने भनिए तापनि निर्धारित समयमा काम सम्पन्न नभएको तथा सर्वसाधारणले अनावश्यक सास्ती व्यहोर्नुपरेको अवस्थालाई स्मरण गराउँदै यसपटक स्पष्ट कार्ययोजना र प्रभावकारी कार्यान्वयनको आवश्यकता औँल्याएको जनाएको छ ।
वडाले सडक बन्द गरिने अवधिमा स्थानीयवासी, यात्रु, व्यवसायी तथा सवारी आवागमनमा पर्ने प्रभावबारे चासो व्यक्त गर्दै सम्बन्धित निकायसँग समन्वय र जवाफदेहिताका लागि छलफल आयोजना गरिएको जनाएको छ ।
स्थानीय तहका जनप्रतिनिधिहरूले “बाटो बन्द गर्ने तर काम समयमै फत्ते नहुने” विगत दोहोरिन नहुने भन्दै निर्माण कार्यको समयसीमा, वैकल्पिक मार्गको व्यवस्था तथा दैनिक प्रगति विवरणबारे स्पष्टता आवश्यक रहेको बताएका छन् ।
यसअघि सडक डिभिजन कार्यालय, काठमाडौंले चित्लाङ–चन्द्रागिरि–थानकोट सडकखण्डमा सुधार तथा निर्माण कार्य गर्न निश्चित अवधिका लागि सवारी आवागमन प्रभावित हुने सूचना सार्वजनिक गरेको थियो । स्थानीयवासीले भने कामको गुणस्तर र समयमै सम्पन्नतामा जोड दिएका छन् ।
स्थानीयवासीका अनुसार सडक पूर्ण रूपमा बन्द हुँदा दैनिक रूपमा काठमाडौं आवतजावत गर्ने सर्वसाधारण, कर्मचारी, विद्यार्थी तथा व्यवसायीहरू प्रत्यक्ष प्रभावित हुने भएका छन् । विशेषगरी चित्लाङ बाट काठमाडौं ल्याइने तरकारी ढुवानीमा समस्या हुने र आकस्मिक बिरामी पर्दा अस्पतालसम्म पुग्न कठिनाइ हुने भन्दै जनगुनासो बढिरहेको छ ।
स्थानीयहरूले सडक बन्दका कारण सर्वसाधारणलाई ठूलो मर्का पर्ने भएकाले पूर्ण रूपमा बाटो बन्द गर्नुको सट्टा बिहान र बेलुका सवारी आवागमनका लागि सडक खुला राखी दिउँसो १० बजेदेखि साँझ ५ बजेसम्म मात्र निर्माण कार्य सञ्चालन गर्न सम्बन्धित निकायसँग आग्रह गरेका छन् ।
“बिहान–बेलुका आवतजावत सहज हुने गरी समय मिलाएर काम गरियो भने स्थानीय, बिरामी, विद्यार्थी र तरकारी ढुवानी गर्ने किसानलाई राहत मिल्छ,” स्थानीयवासीको भनाइ छ ।
