काठमाडौं । स्वास्थ्य बीमा बोर्डले बढ्दो वित्तीय संकटलाई कारण देखाउँदै निजी स्वास्थ्य संस्थाबाट प्रदान हुँदै आएका स्वास्थ्य बीमासम्बन्धी आकस्मिकबाहेकका सबै सेवा स्थगित गर्ने निर्णय गरेको छ ।
बोर्डको २०८३ जेठ ११ गते बसेको बैठकले नेपाल सरकारको स्वास्थ्य बीमा कार्यक्रममा आबद्ध निजी स्वास्थ्य संस्थाबाट प्रदान गरिने आकस्मिक सेवा बाहेकका अन्य सेवा अर्को निर्णय नभएसम्म स्थगन गर्ने निर्णय गरेको हो ।
बोर्डले जारी गरेको सूचनाअनुसार उक्त निर्णय २०८३ साल जेठ १६ गतेदेखि लागू हुनेछ । यससँगै बीमा कार्यक्रममा आबद्ध निजी अस्पताल तथा स्वास्थ्य संस्थाबाट बीमामार्फत प्रदान हुँदै आएका नियमित उपचार तथा अन्य सेवामा प्रत्यक्ष असर पर्ने देखिएको छ ।
स्वास्थ्य बीमा बोर्डले हाल देखिएको वित्तीय संकटलाई व्यवस्थापन गर्न यस्तो निर्णय लिनुपरेको जनाएको छ । बोर्डकी निमित्त कार्यकारी निर्देशक शकुन्तला प्रजापतिद्वारा जारी सूचनामा सम्बन्धित सबै स्वास्थ्य संस्थालाई निर्णय कार्यान्वयन गर्न अनुरोध गरिएको छ ।
यस निर्णयपछि स्वास्थ्य बीमाका सेवाग्राहीले निजी स्वास्थ्य संस्थामा आकस्मिक बाहेकका सेवा उपयोग गर्न कठिनाइ हुने सम्भावना बढेको छ ।
