काठमाडौं । शिक्षा, विज्ञान तथा प्रविधि मन्त्रालयले नेपाल संस्कृत विश्वविद्यालयका रिक्त उपकुलपति, शिक्षाध्यक्ष र कुलसचिव पदपूर्तिका लागि आवेदन आह्वान गरेको छ ।
मन्त्रालयद्वारा गठित छनोट तथा सिफारिस समितिले सार्वजनिक सूचना जारी गर्दै योग्य, अनुभवी तथा इच्छुक व्यक्तिबाट दरखास्त माग गरेको हो ।
समितिले २०८३ जेठ ११ गते स्वीकृत “नेपाल संस्कृत विश्वविद्यालयका उपकुलपति, शिक्षाध्यक्ष र कुलसचिव छनोट तथा सिफारिस सम्बन्धी कार्यविधि–२०८३” अनुसार आवेदन प्रक्रिया सुरु गरिएको जनाएको छ ।
सूचनाअनुसार इच्छुक उम्मेदवारले सूचना प्रकाशित भएको मितिले १० दिनभित्र शिक्षा, विज्ञान तथा प्रविधि मन्त्रालयको आधिकारिक वेबसाइटमार्फत अनलाइन आवेदन दिन सक्नेछन् । आवेदनसँग सम्बन्धित आवश्यक योग्यता, प्रक्रिया तथा अन्य विवरण पनि मन्त्रालयको वेबसाइटमा उपलब्ध गराइएको छ ।
नेपाल संस्कृत विश्वविद्यालयका प्रमुख शैक्षिक तथा प्रशासनिक नेतृत्वसँग सम्बन्धित यी पद लामो समयदेखि रिक्त रहेका बेला मन्त्रालयले नयाँ नेतृत्व चयन प्रक्रिया अघि बढाएको हो । यस निर्णयलाई विश्वविद्यालयको शैक्षिक तथा प्रशासनिक गतिविधिलाई प्रभावकारी बनाउने प्रयासका रूपमा हेरिएको छ ।
