काठमाडौं । चन्द्रागिरि नगरपालिकामा चर्चित गायक पशुपति शर्मा आउने भएका छन् । चन्द्रागिरिमा औद्योगिक सांस्कृतिक, पर्यटन तथा व्यापार महोत्सव २०८१ मा आफ्नो प्रतिभा प्रदर्शन गर्न उनी भोलि ३१ गते चन्द्रागिरि आउन लागेका हुन् ।
मातातीर्थ संरक्षण तथा विकास संस्थाको आयोजनामा असोज २३ गतेदेखि कात्तिक १० गतेसम्म महोत्सव भव्य रुपमा सञ्चालन भइरहेको संस्थाका अध्यक्ष शान्त उदासले शोणितपुर खबरलाई जानकारी दिएका छन् ।
चन्द्रागिरि नगरपालिका वडा नं ६ मा रहेको उच्च धार्मिक महत्वको मातातीर्थ कुण्ड चौरमा आयोजना हुन लागेको उक्त महोत्सवमा दैनिक उपभोग्य सामान, औद्योगिक उत्पादन, सूचना तथा विज्ञान प्रविधि तथा ग्रामीण प्रविधि सम्बन्धी गतिविधको प्रदर्शनमा राखिएको छ।
त्यस्तै, अटोमोबाईल, हस्तकला र कृषि औजारको प्रदर्शनी हुनेछ । साथै, निःशुल्क स्वास्थ्य शिविर तथा एसियाकै उत्कृष्ट बाल उद्यान, राष्ट्रिय, अन्तराष्ट्रिय खाना महोत्सवका साथै अन्य विविध कार्यक्रमको आयोजना गरिरहेको आयोजकले जनाएको छ ।
महोत्सवमा केही विशेष दिनबाहेक अरु दिनमा निःशुल्क प्रवेशको व्यवस्था गरिएको आयोजकले जनाएको छ ।
