काठमाडाैं । सभामुख डोल प्रसाद अर्यालको विशेष उपस्थितिमा वैशाख २७ गते चन्द्रागिरि नगरपालिकाको कार्यालयमा चन्द्रागिरिको समग्र विकासबारे अन्तर्कृया सम्पन्न गरिएको छ ।
अन्तर्कृया कार्यक्रममा विशेषत: कलंकी–नागढुंगा–सिस्नेखोला सडक मापदण्ड, सडक दुर्घटना न्यूनीकरण, सडक स्तरोन्नती, शहरी सौन्दर्यकरण, भू–उपयोग समस्याहरू, खानेपानी समस्या र समाधानका उपाय, रोप वे, सडकबत्ती, सिसिटिभि, तीनवटै सरकारको समन्वय र सेवाको गुणस्तर लगायतका विषयमा छलफल गरिएको थियो ।
प्रतिनिधि सभाका सभामुख डोल प्रसाद अर्यालको विशेष सहभागिता रहेको अन्तर्कृया कार्यक्रममा प्रतिनिधि सभाका सभासदहरू, प्रदेश सभाका सभासदहरू, चन्द्रागिरि नगरपालिकाका नगर प्रमुख, प्रमुख जिल्ला अधिकारी, सुरक्षा निकायका प्रमुख एवं प्रतिनिधिहरू, चन्द्रागिरिका प्रमुख प्रशासकीय अधिकृत, डिभिजन सडक कार्यालय, काठमाडौंका प्रमुख, चन्द्रागिरि नगरपालिकाका जनप्रतिनिधिहरूको समेत उपस्थिति रहेको थियो ।
चन्द्रागिरि नगरपालिकामा आयोजना गरिएको अन्तर्कृया कार्यक्रमले आगामी दिनमा चन्द्रागिरि नगर क्षेत्रको समग्र विकास तथा विद्यमान समस्याहरूको निराकरणमा प्रभावकारी भूमिका खेल्ने विश्लेषण गरिएको छ ।
